DAVAO CITY – Gipanghimakak sa Davao City Police Office (DCPO) ang nahitabong kidnapping incident nga nahitabo duol sa usa ka iladong tulonghaan nga nahimutang sa Obrero ning siyudad.
Sumala sa tigpamaba sa DCPO nga si PMaj. Maria Teresita Gaspan, wala matud pa sila nakadawat og report kalabot niini.
Kahinumduman nga lain na sab nga mensahe via text ang nag-viral karong panahona diin unod niini mao ang aduna matud pay usa ka babaye ang gidagit ug gisakay sa usa ka sakyanan.
Gumikan niini, nanawagan ang kapulisan sa tanang katawhan nga gilayong ipahibalo sa otoridad ang susamang panghitabo alang sa hinanaling pagberipika ug pagimbestiga niini.
Kahinumduman nga bag-ohay lamang sab gisaway ni Davao City Mayor Sebastian Baste Duterte ang mga indibiddwal nga hilig mag post og mga unverified informations sa social media aron lamang magpasikat o makakuha og pagtagad gikan sa mga tawo.
