DAVAO CITY – Gipasalig ni Philippine Army 1001st Infantry Brigade Commander Colonel Ronnie Babac nga walay dapat kabalak-an ang katawhan sa Tagum City, Davao del Norte tungod adunay igong seguridad nga giplastar sa Tagum BJMP alang sa nadakpang NPA leader nga si Eric Jun Casilao.
Sumala pa sa opisyal, doble gwardyado ang kwerpo ni Casilao sa mga personahe sa 1001st Brigade, 60IB ug Tagum City Police, uban ang BJMP aron dili na makagawas pa ang kanhi pugante.
Kahinumdumang gibalhin gikan sa CIDG-Regional Field Unit 11 ngadto sa BJMP Tagum si Casilao ning nakalabayng bulan human siya nga nadakpan sa Malaysia niadtong Abril 2022, ug nakauli dinhi sa nasud niadtong Abril 17, ning tuiga.
Una nang gibutyag sa 10th Infantry Division nga misulay pa sa pagkutlo sa iyang kinabuhi si Casilao sulod sa selda apan napakyas kini human siya napugngan sa mga otoridad.
Sa pikas bahin, malipayong gipaambit ni Babac nga wala nay confirmed sighting sa NPA sa mga probinsya sa Davao del Norte ug Davao de Oro sukad nga gideklara ang insurgency free status sa rehiyon niadtong tuig 2022.
VIA || Bombo LJF
