DAVAO CITY – Aduna nay impormasyon ang kasundaluhan sa gikahimutangan karon sa duha ka mga sundalo nga missing kinsa nalambigit sa pagpatay kang Yvonne Chua Plaza.
Apan, gikanayon ni 10th Infantry Division commander Major General Jose Eriel Niembra nga dili pa sila makahatag og dugang detalye labot niini aron dili mabalda ang nagpadayon nilang operasyon.
Samtang, gikumpirma usab ni Niembra nga sa kasamtangan, anaa gihapon sa kustodiya sa 10th ID ang tulo ka lain pang sundalo nga nalambigit sa kaso ni Plaza nga sila Staff Sergeant Gilbert Plaza, Sergeant Delfin Sialsa Jr. ug Corporal Adrian Cachero.
Giangkon ni Niembra nga naapektuhan ang ilang han-ay sa pagkalambigit sa kasundalohan partikular na ni General Jesus Durante III sa nahisgutang krimen.
Nagpahinumdom usab ang maong opisyal sa mga sakop sa Armed Forces of the Philippines nga angayang magbantay sa mga ginahimo niini ilabi na kung malambigit sa mga susamang krimen sanglit dili lamang kini maghatag og kadaot sa ilang kaugalingon kung dili maduhig usab ang tibuok organisasyon.
