Mikunhod ang ihap sa kaso sa dengue sa Davao City gikan Enero hangtod Mayo 31 ning tuiga, base sa datos sa City Health Office (CHO). Naitala ang 1,682 ka kaso karong tuiga, nga mas ubos kung itandi sa 1,942 nga kaso sa susamang mga bulan niadtong 2024.
Gituohan nga resulta kini sa padayon nga paningkamot sa CHO pinaagi sa ilang Tropical Disease Prevention and Control Unit.
Ilang gipahigayon ang targeted outdoor ug indoor residual spraying sa 761 ka kabalayan, fogging operations sa 78 ka komunidad, ug educational campaigns batok dengue.
Nang-apod-apod sab ang buhatan og 5,792 ka dengue kits ug nakompleto ang 373 ka search-and-destroy operations aron limpyohan ang mga posibleng itloganan sa lamok.
Base sa pinakabag-ong datos sa CHO, ang mga barangay nga nakapamatikod sa pinakataas nga kaso sa dengue mao ang Bucana, Buhangin Proper, Talomo Proper, Tibungo, Calinan Proper, Catalunan Grande, Tigatto, Bunawan Proper, Panacan, Matina Crossing, Cabantian, Maa, Sasa, Catalunan Pequeño, Mintal, Barangay 19-B, Lubogan, Bago Gallera, Sto. Niño, ug Daliao.
Kini nga mga lugar ang gipaningkamutan karon nga hatagan og mas hugot nga monitoring ug interbensyon aron mapugngan ang posible pang pagsaka sa kaso.
Aron mas mapalig-on ang kampanya batok sa dengue, gikan lima ngadto na sa 52 ang kabuuang gidaghanon sa mga miyembro sa Mosquito-Borne Disease Task Force (BMDTF).
Nagpahimangno ang CHO sa publiko nga likayan ang pagkatap sa dengue pinaagi sa kanunay nga pagpanglimpyo sa palibot ug sulod sa panimalay.
Gihangyo sab ang mga mulupyo nga isalikway ang mga butang nga mahimong tamnan og tubig, diin kasagaran mamugos ang lamok.
