Gidismis ang kaso batok sa tulo ka Chinese nationals ug usa ka Pinoy nga nalambigit sa illegal mining sa Purok 2 Mambing, New Corella, Davao del Norte, gumikan sa kakulangon sa ebidensya.
Sumala pa sa New Corella Police Station, ang kaso gisalikway sa korte gumikan ang girepresenta nga mga ebidensya dili igo aron suportahan ang mga alegasyon batok sa mga suspetsado.
Gipang-uli usab sa kapolisan ang mga nakumpiskang gamit susama sa tulo ka backhoe, upat ka water pump, ug duha ka fabricated screener nga gituohan nga gigamit sa illegal nga operasyon.
Kahinumdumang ang ‘Bayan ng New Corella’ nagpahibalo sa publiko pinaagi sa Facebook Post nga ang mga operasyon sa mga Chinese nationals wala magtagbo sa mga kinahanglanon sa Environmental Compliance Certificate (ECC) ug nakalapas usab sumala pa sa Philippine Mining Act of 1995.
Apan, gipaklaro sa mga otoridad, nga ang mga gipresentang ebidensya wala makahatag og igo nga basehan alang sa kaso batok sa mga suspetsado.
