Gihulat na ang taliabot nga kasal sa anak sa pinaka-adunahang tawo sa Asya.
Kini na kuno ang pinakamagarbong kasal sa India karong tuiga.
Si Anant Ambani, sumosunod sa bilyonaryong pamilya, ang magpakasal sa long-time girlfriend niini nga si Radhika Merchant.
Kini karon ang gitawag nga kasal karong tuiga sa India, gikan sa magarbong seremonya hangtod sa mga dagkong personalidad nga gilaumang mutambong.
Niadtong bulan sa Marso, nagbaton ang managtrato ug tulo ka adlaw nga pre-wedding party sa syudad sa Jamnagar nga gitambungan sa 1,200 ka mga iladong bisita nga gilangkuban ni Mark Zuckerberg ug Bill Gates.
Usa ka colorful nga light show ang nahitabo gumikan sa 5,500 ka mga drones ang mihatag ug kahayag sa kahanginan sa palasyo nga gitukod alang sa selebrasyon, kung diin nagsayaw ang mga bisita sa tugtog ni Rihanna.
Samtang niadtong katapusang semana sa bulan sa Mayo, ang managtrato ang adunay upat ka adlaw nga Mediterranean cruise alang sa mga higala ug pamilya ug nag-stop over sila sa nagkadaiyang bahin sa Europa.
Kauban sa mga bisita ang pipila ka iladong artista sa Bollywood ug nag-perform usab sila si Katy Perry, Backstreet Boys ug ang opera star nga si Andrea Bocelli.
Ang nahisgutang kasal sa Mumbai ang gikatakda sa Hulyo 12 hangtod 14 sa pinuy-anan ni Anant.
Ang venue mao ang 27-floor nga gitawag ug Antilia ug makaya niining magpasulod ug mosobra sa 16,000 ka tawo.
Ang ikasala mao ang kinamanghurang anak sa pinakaadunahang tawo sa Asya nga si Mukesh Ambani nga adunay gibana-banaang assets nga mukabat sa $118 billion matod pa sa Bloomberg Billionaires Index.
Kini ang responsable sa pagpalapad sa sektor sa enerhiya sa ilahang family conglomerate nga mao ang Reliance Industries.
Samtang si Radhika Merchant usab 29-anyos ang anak sa iladong negosyante sa pharmaceutical industry nga si Viren Merchant ug nagtrabaho sa kumpanya niini nga mao ang Encore Healthcare.
