DAVAO CITY – Gipahigayon ang send-off ceremony alang sa Bisikleta Iglesia sa Davao City Police Office parade ground kagahapong adlawa, Abril 6 ning kasamtangang tuig.
Sumala pa kang PMaj. Catherine Dela Ray, tigpamaba sa DCPO, anaa sa 162 ka mga personahe ang gipang deploy gikan Abril 6 hangtod Abril 9 kung diin matag police stations nagmugna og Bisekleta Iglesia Team nga adunay 8 ka members nga mag tuyok-tuyok o magpatrolya sa ilahang mga nagkadaiyang area of responsibility.
Nasayran nga magpahigayon og inspeksyon ug patrolya ang maong mga bicycle patrol team ngadto sa nagkadaiyang mga simbahan, tourist spots ug uban pang mga lugar ning siyudad kung asa adunay mga aktibidad nga ipahigayon subay sa Semana Santa.
Gawas pa sa maong bicycle team, kahinumduman nga aduna usab gipakatag nga 7,000 ka mga security forces sa mga simbahan ug ubang lugar aron masiguro ang kaluwasan sa katawhan ug malikayan ang bisan unsang insidente.
Hinuon, sukad niadtong Domingo o Palm Sunday walay natala ang DCPO nga mga insidente atol sa pagsaulog sa Semana Santa ug nanghinaot nga magpabiling hapsay ug malinawon ang dagan hantod mahuman kini, ilabi pa sa pagsugat o Domingo sa Pagkabanhaw diin ginahanduman nga daghang tao ang mangadto sa mga simbahan.
via || Bombo HJR
