DAVAO CITY – Gipaniguro sa Davao City Police Office (DCPO) nga naka alerto ang ilang mga sakop aron masiguro nga matuman gayud ang quarantine measures ilabi na sa mga barangay sa dakbayan nga adunay taas nga kaso sa COVID-19.
Sumala sa pamahayag ni DCPO Director Pol. Col. Kirby John Kraft, anaa sa 236 ka mga lockdown sa tibuok dakbayan ang hugot nga ginabantayan kauban ang pwersa sa Task Force Davao ug Davao Auxilliary.
Giangkon sab niiini nga dakong hagit ang pagbantay sa mga lugar nga gipang lockdown ilabi na nga dili sab kalikayan nga posibleng mataptan ang kapulisan sa makamatay nga kagaw gumikan mao kini ang nangunay sa pagbantay sa mga lugar.
Apan, permi sab gipahimangnuan ang mga otoridad nga bisan paman nga sila ang anaa sa mga lugar, kinahanglan sab nga mutuman sa mga minimum health protocols sama na lamang sa pagsul-ob og face mask, face shield, paghugas og kamot ug social distancing aron malikay sa kagaw.
Sa pikas bahin, gumikan sa pag atubang sa health crisis sa dakbayan, anaa na sa 44 ka mga kapulisan ang nag positibo sa COVID-19.
Hinuon ning kasamtangan, wala nay nagpabilin nga aktibong kaso sa DCPO.
Gawas sa pagbantay sa mga gipang lockdown nga lugar, lakip sab sa tahas sa DCPO ang pagbantay sa mga regulasyon sa dakbayan sama sa curfew ug 24 hour liquor ban.
