DAVAO CITY – Padayon pa karon nga giimbestigahan sa kapulisan kung si kinsa ang nagpadala sa mga endangered species nga agar wood nga kantidad sa milyones ka pesos.
Kahinumduman nga una ng nakumpiska sa airport police sa Davao International Airport ang nahisgutan nga mga kontrabando nga gidala sa usa ka courier company.
Nasayran nga daghanan ang magka-interes sa pagkuha og mga agar wood sanglit usa kini sa mga sangkap sa paggama og mahalon nga pahumot hinungdan nga giila kining usa sa mga nameligro nga mahurot pinasikad sa DENR Administrative Order 2007-01 dinhi sa Pilipinas.
Una ng nagbahad ang otoridad nga mamahimong mag-atubang og silot nga kalapasan sa R.A. 9147 kon Wildlife Resource and Protection Act ingon man PD 705 kon Revised Forestry Code of the Philippines sa higayon nga maaktohan nga manguha niini.
Una ng nasayran nga mikabat sa 700 kabuok nga mga agar woods nga gipangputos ang nakumpiska sa otoridad diin mokantidad sumala pa kini og kapin 17 milyones ka pesos.
Wala sumala pa kini permit to transport ingon man mga dokumento nga gikan sa Department of Environment and Natural Resources (DENR) 11 hinungdan nga nagduda ang otoridad.
Misdeclared sab sumala pa ang mga kontrabando human nga gideklara kini nga mga wood frame.
Sumala pa kang Police Major Ronel Tesorero, hepe sa Davao International Airport police nga plano matud pa nga dad-on ang mga kontrabando sa nasod Vietnam.
Pahayag ni Police Major Ronel Tesorero, hepe sa Davao International Airport police.
