DAVAO CITY – Hugtanon ang gihimong pagbadlong sa mga sakop sa Sta. Ana PNP sa mga mamalitay sanglit sakop sa ilang area of responsibility ang mga tindahan nga sagad dagsaon panahon sa kapaskuhan gumikan sa barato nga pangregalo.
Kagahapong adlawa nahimong okupado ang mga kapulisan sa Sta. Ana human nga gidagsa ang Uyanguren og mga tawo ug halos wala na natuman ang physical distancing.
Sumala pa kang Police Major Benkalin Baluan, ang station commander sa Sta. Ana PNP, gawas sa gipakatag nga mga kapulisan sa lugar, adunay nagpahigayon usab og pagpatrolya aron masiguro nga dili magkagubot ang mga mamalitay.
Dala usab sa iyang mga sakop ang usa ka metros nga stick nga maoy basehan aron masiguro nga motamud ang mga tawo sa physical distancing.
Dili sumala pa kalikayan nga adunay mga tawo nga gahi og ulo hinungdan nga kinahanglan adunay magpahimangno sa mga nahisgutan aron lamang mamentina ang health protocols.
