DAVAO CITY – Nagsaad ang kampo ni Brgy. Bunawan Proper Chairman Ronnie Odeña nga abagahon sa mudaganay nga kapitan ang danyos sa pagpanambal sa mga biktima ug pagpalubong sa 5 anyos nga batang babaye ingon man gipaayo usab niini ang naguba nga gate sa usa ka panimalay nga nadanyos atol sa gilusad nga motorcade kaniadtong Sabado sa buntag, sa may Prk. 17, Promise Land, Bunawan Davao City.
Sa pakighinabi sa Bombo Radyo Davao ngadto kang Odeña, gikanayon niya nga aksidente lamang ang nahitabo. Kahinumduman nga isa ang patay ug duha ang nangaangol human sa disgrasya tali sa motorsiklo ug sakyanan nga kabahin sa motorcade ni Odeña.
Kon diin giila ang mga biktima nga si Mariechan Intapaya, 5 anyos ug ang mga nangaangol nga sila Andrew Tamsi, driver sa motor, 25-anyos; Shiella Mae Casimsiman, 25-anyos.
Gihatagan usab og katinawan ni Odeña nga dili niya drayber ug sakyanan ang gigamit nga maoy nakaligis sa mga biktima.
Hinuon, gipaabot usab ngadto sa nahisgutan ang pasabot niini ngadto sa nahabiling pamilya ni Mariechan ug gikanayon niini nga nasabtan sumala pa nga aksidente ang nahitabo.
Sa pikas bahin, una nang gikanayon sa Bunawan PNP nga nakakustodiya na ang suspek, kinsa ang drayber sa maong sakyanan nga giilang si Geovani Marchan, 41-anyos.
Sumala pa sa Davao City Police Office, wala gipadaplin ang posbilidad nga paspas ang padagan sa nakabangga nga sakyanan, tungod sa kakusog sa impact.
Kon diin gikanayon usab ni PLt. Dante Espejon, ang deputy operations sa maong istasyon nga gikatakdang isumite sa korte ang kasong Reckless Imprudence Resulting to Serious Physical injury and Damage Property batok sa drayber.
Samtang gikanayon usab ni Junie Intapaya, amahan sa 5 anyos nga biktima nga dili pa kini makaingon sa sunod niining lakang hangtud wala pa nahiluna ang patayn’g lawas sa anak niini.
via || Bombo HJR and Bombo LJF
