DAVAO DE ORO- Mokabat sa kapin P100,000 ang kinatibuk-an nga kantidad sa iligal nga droga nga nakumpiska sa mga otoridad atol sa gilusad nga drug buybust operation.
Subay sa report, gipangunahan ang operasyon sa mga operatiba sa PDEA Sa Davao De Oro uban ang mga operatiba sa Davao de Oro Police Provincial Office, Maco Municipal Police Station ug ang PNP Regional Maritime Unit pasado alas Jes ang takna sa gabii. Gilusad ang drug buybust operation sa Purok 9-A, Barangay Poblacion, Maco, Davao de Oro nga miresulta sa sumala pa drug den.
Nadakpan ang target sa operasyon nga naila nga si Marlan Gonzales Gases, 44-anyos, minyu ug residente sa nasampit nga lugar human nga napalitan kini ug usa ka dakong pakete sa iligal nga droga kon shabu nga mitimbang ug usa ka gramo nga adunay kantidad nga Php11,000.
Samtang nadakpan sab ang sumala pa drug den employee, nga si Wilmar Gases ug usa ka drug den visitor nga si Joseph Aligato. Atol sa pagrekisa sa mga otoridad sa balay nga gihimong drug den sa mga dinakpan, laing pakete pa sa iligal nga droga nga gituohang shabu ang nakumpiska nga mokabat sa pito ka mga managlahing gidak-on.
Mitimbang kini ug katorse gramos samtang adunay gibana-banaan nga kantidad nga mobalor ngadto sa Php 95,200. Samtang narekober sab sa mga otoridad ang usa ka pakete nga adunay shabu residue, mga nagkadaiyang drug paraphernalia. Samtang narekober sab ang buy-bust marked money atol sa operasyon.
Sa kinatibuk-an mokabat sa P106,000 ang kantidad sa nakumpiska nga iligal nga droga.
Sa karon ang mga dinakpan ang anaa na sa kostudiya sa mga otoridad samtang giandam na ang kasong pagsupak sa RA 9165 nga ipasaka batok sa mga dinakpan.
