DAVAO CITY – Dakpan sa hiniusang puwersa sa Davao del Norte Provincial Office sa Philippine Drug Enforcement Agency Regional Office XI kaabag ang Provincial Intelligence Branch sa Davao del Norte Police Provincial Office ingon man Tagum City Police Station sa ilang joint buy-bust operation sa Purok 1, Rizal, Barangay Canocotan, Tagum City, Davao del Norte ang usa ka lisensiyado nga criminologist.
Naila ang suspek nga si Cris Silvester John Inso Calapan alyas Jan-jan, 34 anyos, ulitawo, ug residente sa Visayan Village, Tagum City, Davao del Norte.
Nasikop ang nahisgutan human nga nakuhaan sa otoridad nga nagpaka-aron ingnon nga poseur buyer og pakete sa ginadili nga druga nga motimbang og lima ka gramos ug mokantidad kini sa P19,000.
Narekober sab ang 21 ka mga pakete sa mga nagkadaiyang gidak-on sa shabu nga motimbang og kapin kun kulang 110 grams nga adunay street value nga Php. 1,430,000, buy-bust marked money ug sakyanan nga gigamit sa illegal drug transaction atol sa anti-drug operation.
Balhug karon ang suspek sa Philippine Drug Enforcement Agency Regional Office XI detention facility.
Samtang gikatakdang isumite sa Laboratory Service ang mga illegal drugs aron nga ipailalom sa eksaminasyon.
Susama nga mag-atubang ang mga nahisgutan og kasong kalapasan sa Republic Act 9165 o Comprehensive Dangerous Drugs Act of 2002.
