DAVAO CITY – Makapanibawt og balahibo ang nasinatiang mass hysteria sa onse ka mga estudyante sa Digos City National High School kagahapon, Setyembre 25, human sa morning flag ceremony.
Ang mga estudyante nagsugod sa pagpakita sa mga simtomas sa mass hysteria, lakip ang dili mapugngan nga paghilak, hyperventilation, ug panic attack.
Dali-dali nga gitabangan sa mga kawani sa maong eskuylahan ug mga medical professionals ang mga estudyante alang sa paghatag og dinaliang medikal nga atensyon ug gisugdan ang usa ka spiritual support program aron makahatag kahupayan ug emosyonal nga giya sa mga estudyante.
Gikumpirma sab sa Digos City Division sa Department of Education ang maong panghitabo. Sumala pa sa gipagawas nga pahayag, nakasinati ang onse ka mga estudyante og tumang emosyonal, pampamilya, ug pang-kahimsog nga suliran.
Wala sab nakatimo sa ilang pamahaw ang maong mga estudyante, ug dunay usa niana ang misulay nga samaran ang iyang pulso. Gikatakdang i-schedule sila alang sa usa ka counseling ug maglusad sab og religious rites alang sa pagpahawan sa mga dautang elemento.
Gina-monitor sab sa mga administrator inubanan sa ilang mga ginikanan ug guardian ang onse ka mga estudyante.
Kini nga insidente nagsilbi nga usa ka pahinumdom sa kamahinungdanon sa mental health ug emosyonal nga kaayohan nga suporta sulod sa mga educational insitutions.
Balik-klase na sab sa maong tulunghaan karong adlawa.
