DAVAO CITY – Gihatagan og special send off ang tanang myembro sa Davao City Delegation sa umaabot nga Batang Pinoy National Games ug Philippine National Games nga ipahigayon karong Disyembre 17 hangtud 22 sa Metro Manila.
Sumala pa sa Sports Development Division sa Davao City Mayor’s Office, kini na ang pinakadagkong delegasyon nga ipadala ngadto sa kaulohan nga gilangkuban sa 220 ka mga atleta alang sa Philippine National Games; ug 348 ka mga musalmot sa Batang Pinoy National Games karong tuiga.
Suma total, anaa sa 568 ang mga atleta ug coaches nga dungang makigsangka sa mga dula atol sa duha ka mga dagkong sporting events sa nasud.
Mapasalamaton ug malaumon si Mayor Sebastian Duterte sa mga atletang Dabawenyo sa pagpaningkamot ug pagsalig nga ilang nadawat.
Nunot sa kumpetisyon, mapatigbabaw gihapon ang sportsmanship sa mga atleta, ug labaw sa tanan, ang enjoyment sa matag dula nga ilang pagasagubangon.
Kumpyansa ang lokal nga panggamhanan nga mapakita ang passion and competitiveness sa mga Dabawenyo sa natag sa paugnat sa kusog.
Gikatakdang mag-abot ang anaa sa 18,000 ka mga atleta gikan sa managlahing bahin sa nasud alang sa opening ceremonies sa Batang Pinoy and Philippine National Games karong Dominggo, sa Ninoy Aquino Stadium sa Maynila.
Ang dungan nga pagpahigayon sa Batang Pinoy and Philippine National Games ang magpakita sa 25 ka mga sports sama sa archery, arnis, athletics, badminton, basketball 3 by 3, boxing, chess, cycling, dancesport, football, gymnastics, judo, karatedo, kickboxing, lawn tennis, muay thai, pencak silat, sepak takraw, swimming, table tennis, taekwondo, beach volleyball, wrestling, weightlifting ug wushu.
