DAVAO CITY – Nakatala sumala pa ang Bureau of Fire Protection (BFP) Davao Region sukad Enero hangtud Nobyembre 2019 og kinatibuk-ang 439 fire incidents dinhi sa dakbayan sa Davao o adunay gibana-banaang P73 million nga kadaut o lima ang natalang namatay.
Sumala pa kang Senior Fire Officer 2 Ramil Gillado, Investigation Section chief sa BFP-Davao, nga sa nahisgutan nga ihap 20 niini ang giilang “major” fire incidents.
Sa milabay nga bulan sa Oktubre, usa ka estudyante sa Calinan ang namatay tungod sa creative costume niini nga gilamoy og kalayo atol sa ilang Bansag’s Mister and Miss Intramurals diin nakasinate kini og grabe nga paso sa iyang lawas.
Gikanayong Top 3 sa mga klase sa sunog ang gilangkuban sa residential, grass ug rubbish fire.
Base sa ilang data, misaka ang insidente sa sunog karong tuiga kung itandi sa 422 sa 2018.
Apan kung basehan ang kadaut, miubos kini kung itandi sa milabay nga tuig nga anaa sa P127 million.
Gikanayong nakatabang sumala pa ang pagpatuman sa Oplan Ligtas Pamayanan (OLP) program sa BFP diin tumong niini nga matabangan ang mga komunidad nga mamahimong disaster-resilient aron nga malikayan ang sunog.
Nasayran sab kang Gillado nga sukad Setyembre ning kasamtangan nga tuig, wala pa silay natalang sunog nga adunay kalambigitan sa mga Christmas lights ug uban pang dekorasyon.
Gikanayong ulahing insidente sa sunog nga adunay kalabutan sa Christmas decors ang nahitabo kaniadtong 2013.
