Mokabat sa kapin 3,000 ka mga security personnel ang ipakatag isip preparasyon sa umaabot nga Semana Santa karong tuiga, sugod Abril 13 hangtod 20.
Sumala pa ni Angel Sumagaysay, hepe sa Public Safety and Security Office (PSSO), ang mga miyembro sa core security cluster naglakip sa Davao City Police Office, Task Force Davao, City Transport and Traffic Management Office, ug uban pang mga support units. Gipamahayag ni Sumagaysay nga sa miaging tuig, ang gidaghanon sa mga gipakatag ang anaa sa 3,020, ug sila gibutang sa mga nailhang pilgrimage areas ingon man usab sa mga tourist destinations, ilabi na ang mga kabaybayonan.
Susama sa miaging tuig, ilahang pagatutukan ang 39 ka mga dagkong simbahan sa tibuok syudad, apil na ang mga simbahan nga nahimutang sa lagyong mga lugar sama sa Paquibato ug Marilog district. Gilauman usab sa Davao City Overland Transport Terminal (DCOTT) ang pagsaka sa ihap sa mga turista tungod sa taas nga relihiyosong holiday samtang ilaha ng gamiton ang bag-ong X-ray baggage machine nga makatabang sa pagdakop sa mga gidili nga butang sama sa hait nga mga gamit o armas.
Samtang gihangyo usab ang mga bus operators nga mangayo og espesyal nga permit aron makabiyahe gawas pa sa ilahang regular nga schedule aron matubag ang panginahanglanon sa mga pasahero.
