DAVAO CITY – Aron masiguro nga magmalinawon ug hapsay ang ipahigayon nga ika-34th Kadayawan sa mosunod nga bulan, gihan-ay na karon sa kapulisan ang ilang ipatuman nga seguridad.
Sumala pa kang Davao City Police Office (DCPO) spokesperson Ma. Theresita Plaza-Gaspan, mokabat sa 3,000 ka mga pulis ang ipakatag sa tibuok siyudad sa Davao ayha sugdan ang mga aktibidad sa unang semana sa Agosto.
Mas daghanang multipliers sumala pa ang ilang ipahimutang sa mga lugar nga adunay mga aktibidad sama sa Indak-indak sa kadalanan sa Agosto 17 ug Pamulak sa Kadayawan sa Agosto 24.
Gawas sa kapulisan, kaabag sab nila sa pagpatuman ug seguridad ang mga security personnel gikan sa Task Force (TF) Davao, volunteer police auxiliary, force multiplier, ug uban pang law enforcement agencies.
Laoman sab sumala pa nga pahugtan ang tulo ka mga checkpoint sa TF-Davao sa Barangay Sirawan, Toril Davao City, Brgy. Lacson, Calinan District ug sa Baragany Licanan sa Bunawan District.
Gikatakda sab sumala pa nga magpahigayon ug aerial surveillance ang Task Force Haribon sa Eastmincom ug gitahasan ang mga sakop sa Special Weapons and Tactics sa PRO-Davao Region nga tutokan ang sentro nga bahin sa dakbayan.
