Mibisita sa Davao Oriental si Pangulong Ferdinand “Bongbong” Marcos Jr. niadtong Oktubre 13, 2025, aron personal nga kumustahon ang mga apektado sa 7.4 magnitude nga linog niadtong Oktubre 10.
Gisugdan sa pangulo ang iyang paglibot sa Manay Davao Oriental Provincial Hospital diin nakigkita siya sa mga pasyente ug frontline health workers.
Sunod, giduyog niya ang mga residente sa Tarragona nga gipanghikling tungod sa kadaut sa linog.
Nakigpulong si PBBM sa mga opisyal sa rehiyon ug lokal gikan sa Office of Civil Defense (OCD), Department of Social Welfare and Development (DSWD), Department of Health (DOH), Department of the Interior and Local Government (DILG), Department of Education (DepEd), ug ubang mga opisina sa provincial government.
Gihisgutan ang datos sa kadaut sa kabalayan, eskwelahan, ug ospital, ingon man ang lista sa mga apektadong residente sa matag munisipalidad sa probinsya.
Gibana-banaan nga anaa sa PhP158.3 milyon nga kantidad sa pinansyal nga tabang ang gihatag ni Pangulong Ferdinand Marcos Jr. sa mga lokal nga panggamhanan sa Davao Region nga grabeng naapektuhan sa linog nga adunay gikusgon nga 7.4 magnitude.
Sumala ni Palace Press Officer Usec. Claire Castro, ang PhP50 milyon niini gi-allocate alang sa Davao Oriental; PhP10 milyon alang sa Mati City; tag-PhP15 milyon alang sa Manay, Banaybanay, ug Lupon.
Samtang tag-PhP10 milyon ang gihatag usab sa Tarragona ug Baganga.
Sumala ni Usec. Castro, ang maong suporta nga gikan sa Office of the President gigahin aron matabangan ang mga apektadong katawhan alang sa pagbangon gikan sa kadaot nga dala sa linog
Ang pagbisita sa pangulo nagpakita sa suporta sa national government sa pagtabang ug pagpanglimpyo sa mga lugar nga apektado sa katalagman.
