DAVAO CITY – Kapin 1,500 ka mga indibidwal nga nanimuyo sa Magsaysay, Davao del Sur ang mihiklin human ang magnitude 6.6 nga linog nga miigo sa Tulunan, Cotabato sa milabay nga adlaw.
Subay sa datus gikan munisipalidad sa Magsaysay, kinatibuk-ang 1,571 ka mga indibidwal gikan sa 867 ka mga pamilya ang gipahimutang sa walo ka mga evacuation areas.
Sumala pa kang Magsaysay Mayor Arthur Davin pipila sa mga apektadong residente ang temporaryong gipahimutang sa elementary schools.
Gitataw sab sa opisyal nga ang Office of the Civil Defense-Davao paspas nga mitukod ug bag-ong evacuation center ug magpadala sab sila karong adlawa ug dugang nga mga tents.
Kahinumduman nga ang Magsaysay ang usa sa mga grabe nga naapektohan sa magnitude 6.3 quake sa Mindanao nga nagbilin ug P200 million nga kantidad sa kadaut sa mga imprastraktura ug tulo ka mga indibidwal ang namatay.
Samtang gibutyag sab ni Magsaysay Municipality Information Officer Anthony Allada nga padayon ang gipahigayon karon nga assessment sa local government engineering office kalabot sa kadaut nga gihatud sa linog.
Pipila niini ang gilangkuban sa mga gambalay, tulonghaan ug municipal hall sa Magsaysay. Laoman sab sumala pa nga mas dako ang gihatud nga kadaut sa milabay nga linog sanglit mas kusog kini kung itandi kaniadtong Oktubre 16.
