DAVAO CITY – Gibana-bana nga mokapin sa 150 ka mga balay ug usaka mosque ang na-ugdaw sa dakong sunog nga nahitabo sa Barangay 23-C Isla Verde ning dakbayan sa Dabaw karong adlawa lamang.
Partially damage sab ang Zonta Elementary School human masunog ang portion sa atop nga bahin niini.
Subay sa inisyal nga imbestigasyon, mukabat ngadto sa P2,625,000 ang gibana-banaang namugnang danyos sa maong sunog.
Gibutyag ni Romeo Pejo nga taga City Social Services and Development Office (CSSDO) nga kini na matud pa ang ika-siyam nga sunog nga nahitabo sa Isla Verde sukad niadtong tuig 2014.
Sa pikas bahin, gikanayon ni Fire Inspectior Ezequil Tabon, fire investigator sa Bureau of Fire Protection (BFP) nga nakadawat sila ug tawag alas 11:21 kaganihang udto labot sa sunog nga naka-apekto sa tulo ka mga purok sa nahisgutang barangay.
Gikanayon nga nanukad ang sunog sa ika-duhang andana sa boarding house nga gipanag-iyahan sa magtiayong Layla ug King Elasio apan padayun pa kining ginaberipika sa otoridad.
Gideklara nga fire-out ala 1:37 sa hapon human gipa-taas ngadto sa alert level 4 gumikan sa ka-grabe niini.
Dugang pa ni Fire Inspector Tabon, gumikan sa kusog ug pag-usab-usab nga direksiyon sa hangin hinungdan nga daghang mga balay ang na-ugdaw gawas pa nga gama ang mga nahisgutan sa mga light materials lamang.
Gitin-aw ni Tabon nga paspas ang pag-responde sa kabomberohan, apan nalangay ang pag-plastar niini gumikan sa ka-piot sa dalan ug sa kadaghan sa mga tawo nga nagtapok sa dalan aron lamang mangosyoso.
Sa karon, padayun gihapon ang imbestigasyon sa kabomberohan kung unsa gayud ang hinungdan sa maong dakong sunog.
-Photo Credits: Knighthawk Rescue Team-
