Gipasakahan na og kaso sa mga kapulisan sa Digos City Drug Enforcement Unit ang suspek sa pagpayuhot og iligal nga droga kon shabu nga mokabat sa kapin usa ka milyon.
Kasong pagsupak sa RA 9165 ang gipasaka sa piskalya batok sa dinakpan. Kahinumduman nga gilusad ang operasyon sa mga operatiba sa Digos PNP ang drug buybust operation sa Purok Kalubihan sa Barangay Cogon pasado alas dose kagahapon sa kaadlawon.
Giila ang dinakpan nga si Alyas “Man”, nga naaktuhan sa aktong pagpamaligya og ginadiling droga. Nakuha gikan sa suspetsado ang 151.51 ka gramos sa gituohang shabu nga gibana-banaan nga nagkantidad ug P1,030,000 subay sa standard drug price. Nakumpiska usab sa mga otoridad ang ubang ebidensya nga gituohang gigamit sa pagpamaligya og iligal nga droga.Ang nasampit nga operasyon usa ka dakong kalampusan sa kampanya batok sa iligal nga droga sa syudad.
Sa pagkakaron ang dinakpan ang anaa na sa kostudiya sa kapulisan sa Digos ug gipaabot na lamang ang kamanduan gikan sa korte. Samtang padayon usab ang pagpahimangno sa kapulisan sa publiko nga suportahan ang kampanya batok iligal nga droga pinaagi sa pakig-alayon sa mga otoridad.
