DAVAO CITY – Gipangunahan ni Provincial Director, PCol Marcial Mariano Magistrado ang gipahigayon nga ceremonial burning sa 4,000,000.00 nga kantidad sa marijuana plants nga gipahigayon sa Davao Oriental Police Provincial Office, Mati City, Davao Oriental.
Gikanayong 21,000 ka punoan sa fully-grown marijuana ang gipanglarot sa mga sakop sa PRO 11-Davao Oriental Police Provincial Office, Philippine Drug Enforcement Agency (PDEA) ug Philippine Army (PA) atol sa ilang duruha ka adlaw nga marijuana eradication operation sa bukiron nga bahin sa Malambogot ug Lombong Sitio Tagbaloyan, Brgy. Tubaon, Tarragona, Davao Oriental.
Sumala pa kang Pol. Brig. Gen. Filmore Escobal, Regional Director sa PRO-11, nga ang ceremonial burning nagsimbolo sa determinasyon sa gobyerno pinaagi sa hiniusang pagpaningkamot sa law enforcement agencies aron nga batukan ang paghitak sa ginadili nga druga.
Una ng gilusad ang operasyon human nga nakadawat og impormasyon ang otoridad nga ang usa ka Melindo Malintad ug anak niini nga si Jurel Malintad, Alias Palalan ang nagtanom og marijuana sa Lombong, Sitio Tagbaloyan, Brgy. Tubaon, Tarragona, Davao Oriental.
Apan nakaikyas ang mga nahisgutan ayha pa man miabot ang otoridad.
Nasayran nga ang mga suspek adunay naka-ong-ong nga mga kaso gumikan pa gihapon sa pagkalambigit sa mga nahisgutan sa illegal nga druga.
Gikanayong naghitak ang pagtanom og marijuana sa bukiron nga bahin sa nahisgutan nga lalawigan gumikan kay ang mga rebelde mismo ang nag-protekta sa mga nagtanom niini.
Misaad ang otoridad nga dili moundang sa ilang pagpaningkamot nga batukan ang ginadili nga druga nga usa sa mga kampanya sa kasamtangang administrasyon.
