DAVAO CITY – Gibisita ni kanhi Pangulong Rodrigo Duterte ang Balay Dangupan sa Davao City aron manghatag ug pinaskuhan ngadto sa mga bata.
Nakauban ni PFRRD ang mga bata sa nahisgutang balay dangpanan atol sa Christmas party kaniadtong Biyernes, Disyembre 23.
Nang-apudapud sab ang kanhi pangulo ug mga pagkaon ug regalo sa dul-ang 50 ka mga bata ug 29 ka mga shelter workers.
Atol sab sa iyang pagbisita, gipanaad ni PFRRD nga iyang palapdan pa ang maong pasilidad tungod sa problema sa kakuwangon sa espasyo alang sa mas daghang mga bata.
Gikanayon sab ni Duterte nga iyang pangayuan ang iyang mga anak nga sila Coucilor Pulong Duterte ug Davao City Mayor Baste Duterte og dugang pondo alang sa gilaraw nga expansion sa maong pasilidad.
Kauban niya atol sa pagpanghatag ug pinaskuhan ang iyang asawa nga si Honeylet Avanceña ug Senator Christopher Bong Go nga nagkanayong usa sa labing huyang nga sektor ang mga kabataan tungod kay dili sila hingpit nga makahimo sa pagpanalipod sa ilang kaugalingon.
Paningkamutan matud pa sa gobyerno nga magduso ug dugang nga mga programa sa pagpanalipod sa mga bata.
Ang Balay Dangupan, gi-establisar sa lokal nga panggamhan sa Davao City kaniadong 2015 isip temporary shelter alang sa mga batang nakasinati ug pagpangabuso.
via || Bombo LJF
