DAVAO CITY – Gibarugan ni kanhi pangulong Rodrigo Duterte atol sa nahitabong pakighinabi sa Davao Media kagabii, Abril 11, nga taliwala sa mga alegasyon nga dunay nahitabong gentleman’s agreement tali kaniya ug Chinese President Xi Jin Ping panahon sa iyang pagpangatundanan isip pangulo, wala kini bisan unsa gi-surrender ngadto sa China.
Pagpasalig pa niini nga bisan pa man, gipabilin niini ang malinawon nga diplomasya tali sa duha ka nasud ilabi na sa hisgutanan sa giilugang teritoryo sa West Philippine Sea.
Gisaysay pa sa kanhi pangulo nga panahon sa iyang pag-adto sa China uban ang kanhi myembro sa gabinete niini nga sila kanhi kalihim sa National Defense nga si Delfin Lorenzana ug kanhi interior secretary Eduardo Año, dihang gihisgutan nila ni Xi ang mga isyu sa giilugang teritoryo, lakip na ang laraw niini nga manguha og lana sa maong maritime area.
Apan giangkon ni Digong nga wala miuyon niini si Xi ug inay nagpagawas kini og pagbahad ngadto kang Duterte.
Gipunting pag-usab ni Digong nga gipasibaw niini ang diplomasya ngadto sa mga Tsino aron di na subling muulbo pa ang tensyon.
Diha na gibutyag sa kanhi pangulo ang posibilidad nga dunay kagubot nga mahitabo kon gipugos pa sa Pilipinas ang katungod niini sa West Philippine Sea.
Nagkasinabot pa ang duha ka lider nga ipadayon pa ang ilahang panag-istorya apan wala na kini gisundan pa.
Matod niya, lakip sa uban, nga walay katungod ang mga tawo nga wala diha sa iyang pakighinabi sa presidente sa China sa pagsulti bahin sa isyu, ilabi na sa “gentleman’s agreement” aron mapabilin ang kalinaw sa West Philippine Sea.
Samtang giakusahan sa China ang Pilipinas sa paglapas sa iyang teritoryo ug soberanya sa West Philippine Sea, nga nag-angkon sa Ayungin Shoal.
Sumala pa ni Foreign Ministry Spokesperson Mao Ning, gilimod sa Malacanang ang saad niini nga i-tow away ang barko sa BRP Sierra Madre taliwala sa unang saad niini.
Sa pagkakaron, giduso na karon sa Kamara ang alegasyong gentleman’s agreement tali sa duha ka lider nga sumala pa nakahatag karon og potesyal nga kumpurmiso sa soberanya sa nasud Pilipinas.
