DAVAO CITY – Gilunsad kagahapon sa Davao City Police Office ang usa ka kampanya nga buot maghatag og mga pagtulun-an aron mabatukan ang pagpanglugos nunot sa ubay-ubay nga pagsaka sa kaso sa rape cases sa Davao City.
Gitawag nila kining Oplan Kilos kon “Kababaihan/Kabantan-onan/Kalalakinhan Igiya Laban sa Pagpanglugos”.
Gipangunahan ni Police Regional Office 11 Regional Director Police Brigadier General Alden Delvo ang maong launching event nga gisalmutan sab sa station commanders ug uban pang ahensya sa gobyerno.
Gikabutyag ni Delvo nga makaalarma ang mga kaso sa rape dinhi sa dakbayan nga sumala pa, nagkinahanglan og dugang enforcement gikan sa mga LGUs, simbahan, socio-civic organizations, academe, medical sectors, ug ang komunidad aron makunhuran ang ihap sa mga kaso.
Gikanayon sab ni DCPO Director Col. Alberto Lupaz nga mupahigayon sila og mga seminars ug lectures sa mga barangay diin taas ang mga kaso sa pagpanglugos.
Pangunahan kini sa kapulisan aron masayod ang mga katawhan sa mga angayng buhaton aron malikayan nga mabiktima sa lugos.
Sumala sa datos sa DCPO, miabot na sa 144 ang mga natalang rape cases dinhi sa dakbayan kaniadtong 2022. Samtang nasa 1,353 ang kinatibuk-ang ihap sa susamang kaso gikan 2017 hangtud 2022.
