Gipunto sa depensa ni kanhing Pangulong Rodrigo Duterte nga imposible sumala pa nga gamiton ang mga pamahayag sa kanhing pangulo isip basihan aron mapamatud-an ang criminal intent.
Nagpasidaan usab kini sa giingong dili kompleto nga presentasyon sa Prosekyusyon sa tinuod nga konteksto sa mga pahayag sa kanhing punong ehekutibo.
Sa ikatulong adlaw nga confirmation of charges hearing sa kaso nga Crimes Against Humanity sa kanhing Pangulo, gipasabot ni Atty. Kaufman ang pamahayag nga gigamit ni ICC Deputy Prosecutor Mame Mandiaye Niang sa iyang opening statement.
Ang maong pamahayag, sumala sa depensa, naghisgot sa pag-angkon ni Duterte sa responsibilidad ug sa iyang saad nga protektahan ang mga rogue officers gikan sa prosekyusyon.
Apan gipaklaro sa depensa nga gipakita lamang sa Deputy Prosecutor ang pipila ka bahin sa pamahayag sa pangulo.
Bisan pa man niini, gipasabot sa kampo ni Duterte nga aduna pay mahinungdanong bahin nga tinuyoang gikuha sa Prosekuusyon.
Gipakita sa abogado ang sunod nga bahin sa maong pamahayag diin klaro nga nagmando ang kanhing pangulo sa mga awtoridad nga unahon ang malinawon nga pagdakop sa mga akusado.
Kahinumduman, gipasabot sa depensa nga bisan pa man nga giila ang kanhing pangulo sa iyang isog nga pag-estorya, ang kinatibuk-ang mensahe sa direktiba mao ang pagdasig sa lawful self-defense.
Sumala sa abogado, ang tibuok pahayag nagpakita nga ang paggamit sa pagpugos o kusog gitugotan lamang kung adunay violent resistance nga nagbutang sa kinabuhi sa mga pulis sa peligro, ug nagpamatuod kini nga walay giingong criminal intent ang kanhing administrasyon sa iyahang mga war on drugs.
