DAVAO CITY – Human nga gi-anunsiyo sa Malacañang nga dili na nila lugwayan ang gipatuman nga Martial law sa Mindanao, gibutyag sa mga otoridad nga pahugtan na lamang nila karon ang seguridad pinaagi sa pagpahimutang og dugang mga personahe sa tulo ka mga border control dinhi sa siyudad.
Gipasalig ni Davao City Police Office (DCPO) Director Colonel Kirby John Kraft, nga ang mga kapulisan sa DCPO ang nakatutok aron nga masiguro ang kaluwasan sa publiko bisan nga hingpit na nga tapuson ang martial law.
Gitataw sab sa opisyal nga magpahimutang sila og dugang mga personahe sa checkpoints sa Lasang, Toril ug Calinan.
Kahinumduman nga kaniadtong milabay nga Agosto ning kasamtangan nga tuig, gipalabang sa siyudad ang resolusyon nga dili na ilakip ang siyudad sa martial law gumikan kay makaapekto kini sa business and investment climate sa dakbayan.
Apan luyo sumala pa sa maong sugyot, dako ang pagtuo ni Kraft nga tapuson na ang pagpatuman sa balaod militar.
Isip preperasyon, nagpatuman na sila og security measures kaabag ang ilang counterparts sa Task Force Davao.
Girekomenda sab nila ang padayon nga pagpatuman sa “gun ban” dinhi sa siyudad.
Gikanayong ang gun ban alang sa 2020 gi-aprubahan kaniadtong Disyembre 3.
Naghulat na lamang sila karon sa tubag gikan sa Philippine National Police (PNP) headquarters.
Gikanayong ang PNP chief adunay gahom aron isuspende ang permit to carry firearms apan sa kasamtangan nagpabilin pa gihapon nga bakante ang posisyon.
Samtang sa bahin ni Colonel Nolasco Mempin, commander sa 1003rd Infantry Brigade, welcome sa ilang bahin ang nahimong desisyon ni Pangulong Rodrigo Duterte nga tapuson na ang Martial law.
