DAVAO REGION- Magtanyag og labing menos tres mil ka mga bakanteng trabaho ang ipahigayong Kalayaan Job Fair 2024, karong umalabot nga Hunyo 12.
Sumala ni DOLE-11 Director Randolf Pensoy, ipahigayon ang maong jobs fair sa Gaisano Mall of Davao diin maghiusa sa 43 ka mga employer sa rehiyon, nga nagtanyag sa 1,979 ka lokal ug 1,778 ka trabaho sa gawas sa nasod.
Nagpangita karon og mga trabahante ilawom sa Customer service, sales and marketing, technical support, mechanical technology, ug accounting-related nga mga trabaho nga nahilakip sa top five job opportunities sa kinatibuk-ang lokalidad.
Samtang, ang nanguna nga mga oportunidad sa gawas sa nasud naglakip sa mga nars, manufacturing operators, ug production operators.
Nagsugod na ang online pre-registration niadtong Mayo 31 aron maka-adapt ang ahensya sa hybrid selection process diin adunay kahigayunan ang mga pre-registered jobseekers nga malaktaw ang mga initial step sa pagpangita og trabaho ug mupaingon dayon sa validation and interview stages.
Hinuon, gi-awhag sab ang mga walk-in nga mga aplikante nga magpa-register sa mismong adlaw sa job fair busa dili dapat kalimtan ang pagsul-ob og corporate attire ug pagdala sa ilahang resume, biodata ug uban pang rekisito.
Kabahin kini sa pagsaulog sa ika-126 nga Independence Day nga nakaangkla sa tema nga “Kalayaan. Kinabukasan. Kasaysayan.” Ipasundayag usab sa DOLE-11 ang Kadiwa ng Pangulo Fair, nga magpakita sa nagkadaiyang lokal ug presko nga produkto gikan sa 11 ka livelihood beneficiaries gikan sa siyudad ug mga probinsya sa Davao del Sur ug Davao del Norte.
