DAVAO CITY – Human ang pipila ka higayon nga konsultasyon nga gipaluyohan sa Land Transportation Franchising and Regulatory Board (LTFRB) 11, mipakita na og pag-uyon ang kadaghanan sa mga drivers ug operators sa mga pampublikong sakyanan sa dakbayan sa Dabaw sa pagpatuman sa High Priority Bus System (HPBS).
Kahinumduman nga dungan sa ipatuman nga transport modernization program, hingpit na sab nga ipatuman ang pag-phase out sa pipila ka mga sakyanan aron hatagan og higayon ang pagpatuman sa modernong sistema sa transportasyon sa tibuok dakbayan sa Dabaw.
Atol sa gipahigayong konsultasyon kagahapong adlawa sa SIR covered Court ning dakbayan, subli nga nagtapok ang libuan ka mga PUJ operators ug driver sa syudad aron paminawon ang katin-awan labot sa ihatag nga tabang sa lokal nga kagamhanan ngadto sa mga maapektuhan.
Gikanayon ni Evangeline Tangkay, usa sa mga operator nga mitambong sa konsultasyon, wala siyay pagsupak sa nahisgutang lakang ilabi pa kay adunay mga maayong tanyag ang lokal nga kagamhanan.
Sa pikas bahin, gikanayon ni PCUP commissioner Norman Baloro, kinsa tigpamaba usab sa HPBS nga ika-lima na kini nga konsultasyon ug tanan nga mga drivers ug operators ang nakasabot na sa maong proyekto.
Naka-sentro sumala pa sa konsultasyon ang pagpasabot sa mga benepisyo ug tabang nga madawat sa mga apektado drivers ug operators. Andam na sumala pa ang ihatag nga cash assistance ug ang 3 ka mga non-financial assistance package nga mamahimong kapilian sa mga nahisgutan.
