DAVAO CITY – Kabag-ohay sa kadumalahan sa Davao del Norte ang gipasalig sa bag-ong Davao del Norte Governor Edwin Jubahib.
Kini ang gipamulong ni Jubahib atol sa ika-52 ka tuig nga kasumaran sa kamugnaan niining adlawa.
Gitataw ni Jubahib ang pagpatuman sa mga proyekto ug serbisyo nga dugay na nga gipa-abot sa mga taga-Davao del Norte ug gipaneguto nga iya na kini ikahatag.
Nag-una niini mao ang kongkreto nga mga kadalanan ug pgpadala ug mga heavy equipments sa mga munisipyo aron nga mamahimo nga paspas ang pagtukod ug maintenance.
Gimando sab ni Jubahib nga himoon nga tibuok adlaw ang paghimo ug karsada inay nga pipila lamang ka oras.
Mipahigayon ug rollcall si Gov. Jubahib atol sa anibersaryo sa Davao del Norte. Gipangita ni Jubahib ang mga empleyado sa kagamhanang panlalawigan human gika-ingon nga nang-resign ang mga trabahante nga mga kanhi supporter ni kanhi Gov. Anthony del Rosario.
Nasayran nga kapin tres mil ang mga empleyado sa kagamhanang panlalawigan sa Davao del Norte.
Gipasalig ni Gov. Edwin Jubahib nga wala’y mahitabo nga pagpanaktak ug mga empleyado, labi na sa mga supporters sa mga del Rosario.
Hinoon gi-oblega niya kini nga mohimo gayud sa ilang mga gimbuhaton.
