DAVAO CITY – Mibisita si Justice Secretary Jesus Crispin Remulla dinhi sa dakbayan sa Davao kagahapon alang sa iyang partisipasyon sa National Convention of the Prosecutor’s League of the Philippines nga gilusad sugod kaniadtong Lunes.
Sa natigayong press conference kagahapon sa SMX Convention Center ning dakbayan, gikabutyag ni Remulla nga mapasakahan og kaso ang 10 ka mga suspek nga nalambigit sa pagpatay kang Negros Oriental Governor Roel Degamo kaniadtong Marso 4.
Samtang gikabutyag sab ni Secretary Remulla nga nagpabilin gihapong usa sa mga persons of interest sa pagpatay kang Governor Degamo si Negros Oriental 3rd District Rep. Arnolfo Teves.
Sumala pa sa opisyal, lauman ang pagpasaka og kaso si Teves kon mapamatud-an sa hukmanan ang pagkalambigit sa maong krimen.
Apan mahitabo lang kana kon siya mismo ang magpakita aron irekisa ang iyang kaugalingon alang sa imbestigasyon. Una nang gikonsidera ni Remulla si Teves isip “fugitive” o usa ka kriminal nga wala nagpakita o at large gihapon sa mga otoridad.
Apan iyang gipaklaro atol sa presscon nga bisan pa man sa pagkalambigit sa krimen, dili gihapon makonsiderang “fugitive” si Teves gumikan wala pa gipagawas ang blue notice batok kaniya nga kasamtangang ginalihok ngadto sa Interpol.
Nagpadayon gihapon ang imbestigasyon sa DOJ sa mga gikustodiyang suspek ug gipasalig ang mga lig-ong ebidensya nga magpamatuod sa pagka-mastermind ni Teves.
via || Bombo LJF
