DAVAO CITY – Kumpiyansa lamang sumala pa ang mga residente sa Italy ug wala damha ang kalit nga pagsaka niini hinungdan nga daghanan ang nangamatay.
Kini ang gibutyag ni Bombo Correspondent Analiza Montalban, residente sa Catalunan Grande ning dakbayan sa Davao ug 20 ka tuig na nga nanimuyo sa Milan, Italy.
Sumala kang Analiza, 65 porsyento sa mga residente sa nasod ang mga tigulang hinungdan nga ubay-ubay sa mga nahisgutan ang mga namatay dihang mikuyanap sa nasod ang virus sanglit huyang na ang resistensiya ug immune system niini.
Sa dihang nakatala na kaniadtong bulan sa Pebrero ug tulo ka kaso sa Covid-19 ang Italy, wala lamang kini gihatagan ug pagtagad gumikan kay nagtuo ang mga residente sa lugar nga simple lamang kini nga flu hangtud nga paspas na ang pagsaka niini ug daghanan na ang namatay.
Dugang sa nahisgutan nga ulahi na sab nga nagdeklara ug lockdown ang Italy diin daghanan na ang natakbuyan sa balatian hinungdan nga naglisud na kini pagpugong dihang paspas na ang pagsaka sa mga nahimong biktima.
Sa kasamtangan, daghanang mga establisyemento ug mga negosyo na sab sa Italy ang apektado sanglit pipila niini ang nanirado na sa kasamtangan.
Pipila sab sa mga Pilipino nga OFWs ang naapektohan karon ang ilang trabaho tungod usab sa ilang kahadlok nga matakdan ug virus.
