DAVAO CITY – Gipaniguro sa mga organizers sa Ironman 70.3 triathlon ang intense og best racing experience nga hatud sa mga atleta gikan sa 46 ka mga nasud nga gikataktang mag-agbat og kusog, kapaspas og kalahutay alang sa 1.9k swim-90k bike-21k run distance nga karera karong Marso 26, adlawng Dominggo.
Gikanayon ni Neville Manaois, Ironman race director, nga giandam na nila ang susamang ruta nga agian sa mga atleta. Bisan pa man sa mga gagamayng kausaban, nagpabilin gihapon ang nagpaabot kanilang mga hagit sama sa kainit sa panahon.
Dugang pa nga dugay na nilang gipaabot ang pagbalik sa maong karera human sa pandemya, maong andam na sila sa pagsugat sa mga musalmot nga mga atleta. Manguna sa maong karera ang 18 ka mga professional triathlon athletes, lakip na sila Filipe Azevedo nga taga-Portugal, Matthew Tonge ug Nick Carling nga taga-Australia, Tuan Chun Chang nga taga-Taiwan, ug Lottie Lucas sa Team United Arab Emirates.
Giatangan sab ang mga Pinoy celebrities and athletes na musalmot sa maong triathlon event. Samtang, gipagawas na ni Davao City Mayor Sebastian Duterte ang usa ka Executive Order alang sa temporaryong road closure nga maglukop sa mga dalan pa-southbound gikan Azuela Cove Lanang paingon sa Lasang nga boundary sa Davao City ug Panabo City, Davao del Norte sugod karong Marso 26 gikan alas-3 sa buntag hangtud alas-10:30 sa buntag.
Sarado sab sa susamang adlaw sa karera ang northbound lane gikan Lanang paingon J.P. Laurel Ave./F. Torres St. hangtud Azuela Cove gikan alas-3 sa buntag hangtud alas-3:30 sa hapon alang sa run course.
via || Bombo LJF
