DAVAO CITY – Bisan nga napatay ang gikanayong CEO sa Crowd Royals Real Estate Services (CRRES) nga si Armando Oppus didto sa Cebu, nanghinaut pa gihapon ang mga investors sa nahisgutan nga kompanya nga unta masikop sab ang laing duha ka mga kaubanan niini nga pabiling gawasnon ug mabalik kanila ang gisibat nga kuwarta.
Nagtuo ang kadaghanan sa mga investors nga kung masikop ang laing duruha ka mga suspek nga sila si Edmond Quiñones ug Judy Ann Delatina-Estrella, mabalik sab ang minilyon nga salapi nga gitangag sa mga nahisgutan.
Una ng migula sa imbestigasyon nga ang bana ni Delatina-Estrella, marketing staff sa maong kompanya ang usa ka patrolman nga pulis nga wala misipot sa ilang trabaho sa Davao City Police Office (DCPO) ilalom sa Police Regional Office (PRO)-Davao region.
Migula sab ang impormasyon nga gipahimutang lamang isip CEO sa kompanya si Oppus apan usa diay kini ka real estate broker.
Nasayran nga daghanang investors sab sa Davao del Sur ang wala sba nakadawat ug pay-out human nga gisibat sa mga suspek ang kapin P400 milyones ka pesos.
Dihang wala na nagpakita sa Tagum City ang mga suspetsado, miduso gilayon ug kasong large scale estafa ang mga biktima alang sa hinanali nga pagkasikop sa mga nahisgutan.
