DAVAO CITY – Gibutyag sa provincial government sa Davao Oriental nga momugna sila og inter-agency task force sa 2019 novel coronavirus (2019-nCoV) kini human ang outbreak niini nga mihatud og international alarm.
Sumala pa kang Karen Lou Deloso, Davao Oriental provincial information head, nakiglambigit na karon si Governor Nelson Dayanghirang ngadto sa mga concerned provincial agencies.
Gibutyag sab ni Deloso nga ang pagmugna og task force tipik lamang isip tubag sa direktiba sa Department of the Interior and Local Government (DILG) diin gimandoan ang tanan nga mga local government units nga momugna og task force aron nga ipatuman ang Department of Health (DOH) protocols ug mga sumbanan ingon man full cooperation sa nahisgutan nga ahensiya ngadto sa uban pang government agencies.
Gitataw sa Provincial Health Officer (PHO) pinaagi ni Dr. Herminigilda Nartates nga pinaagi sa executive order nga gi-isyu sa gobernador, usa ka technical working group nga langkuban sa nagkadaiyang concerned agencies ang mugnaon sa hinanali nga panahon aron nga masiguro nga mapatuman ang mga tukma nga sumbanan ug dili makasulod ang novel coronavirus.
Una na sab nga gipahimangnoan ni Dayanghirang ang mga katawhan sa lalawigan nga dili magpanic ug pabilin nga kalma ug angayan nga magbinantayon.
