DAVAO CITY – Wala pa gipagawas ang resulta sa imbestigasyon sa mga otoridad sa tinubdan sa nahitabong insidente sa usa ka Halloween Party sa Itaewon district sa Seoul, South Korea nga gikamatyan sa kapin 150 ka mga tawo lakip na ang mga kabataan ug foreign nationals.
Gikumpirma kana ni Lester John Valdez sa Pinoy Kimchiland atol sa pakighinabi sa Bombo Radyo Davao.
Matud pa, dunay mga anggulong gas leak, pagkabungkag sa drug deal sa sulod sa establisyemento, o pagbisita sa usa ka sikat nga celebrity ang gipunting nga mga hinungdan sa maong kagubot.
Gipaklaro sab ni Valdez nga dili matawag nga stampede ang maong panghitabo tungod duna lamang nahitabong crowd crash nga nahisusama sa domino effect o pagkatumba sa nagkadasok na mga tawo sa suok nga dalan sa Itaewon.
Matud pa ni Valdez, ilado ang Itaewon district sa Seoul sa mga lokal ug langyaw tungod sa buhi nga nightlife niini.
Tinuig nga gipahigayon ang Halloween Party sa Itaewon, apan sa pagbalik niini karong tuig human sa duha ka tuig nga lockdown, gidumog kini pag-ayo sa kapin 100,000 ka mga lokal ug turista.
Nagdeklara na ang pangulo sa South Korea nga si Yoon Suk-yeol ug national week of mourning agig paghasubo sa mga kabanay ug pamilya sa mga namatay sa maong insidente.
Temporaryo sab nga gipahunong ang mga dagkong events sa nasud karung simanaha.
Kagahapon, personal nga niadto ni President Yoon aron maniid sa sitwasyon sa Itaewon nga duol sab sa opisina sa Pangulo sa Seoul.
Nagtagana na sab ug Crisis Center ang panggamhanan alang sa mga magpakitabang nga mga pamilya ug kabanay sa mga biktima sa lugar.
Kini na ang ikaduha sa pinakadagkong mass accident sa South Korea human nahitabo ang pagka-unlod sa MV Sewol niadtong 2014 nga gikamatyan sa kapin 250 ka mga high school students.
Sigun sa datos nga gipagawas sa Interior and Safety Ministry sa nasud, kasamtangang anaa sa 153 ang patay diin 56 ang lalaki, 97 ang babae. Lakip sab sa maong ihap ang 19 ka mga langyaw.
via || Bombo LJ Florendo
