Kasamtangan na nga nagpakaayo sa usa ka ospital ang influencer ug boksingerong si Jake Paul human siya ma-knockout sa kamot ni Anthony Joshua.
Nagpagawas og pipila ka hulagway ang YouTuber nga karon usa na ka heavyweight fighter, ug gipakita niini ang iyang panga nga miagi sa malampusong operasyon.
Matod pa kang Paul, duha ka titanium plates ang gibutang sa tagsa-tagsa ka panga niini.
Gikuhaan usab siya og pipila ka ngipon atol sa maong operasyon.
Human niini, gidid-an una siya sa pagkaon og bisan unsang “solid food”, ug magpadayon kini sulod sa pito (7) ka adlaw sugod ang operasyon.
Kahinumduman nga sa ilang away ni Joshua, upat ka higayon na-knockdown si Paul hangtod nga nahulog na gyud siya sa ika-unom nga round human mabasag ni Joshua ang iyang panga.
Ang maong sangka unta molungtad og walo ka round, sumala sa kontratang ilang gipirmahan.
Kini ang ikaduhang kapildihan ni Paul sa 14 ka professional fights nga iyang nasulayan.
Sa 12 ka kadaogan sa YouTuber, pito niini puro knockout.
