DAVAO CITY – Mikunhod ug usa ka punto ang inflation rate sa Davao Region. Sumala sa datos nga gipagula sa Philippine Statistics Authority – Davao as of December 7, anaa sa 9.7% ang inflation rate sa rehiyon niadtong Nobyembre kon itandi sa 9.8% niadtong Oktubre.
Apan taliwala sa maong pag-ubos, wala matud pa napugong ang pagsaka sa presyo sa mga palaliton.
Pipila sa mga produktong sagad nagmahal mao ang alak ug sigarilyo, panabton, mga gamit pambalay, tambal, kalingawan, mga kan-anan ug akomodasyon, prepaid ug postpaid loads, ug personal care products.
Namatikdan sab ang pagmahal sa presyo sa mga pagkaon ug pangonsumo sama sa mais, mantika, ug tam-is nga mga pagkaon kon desserts.
Hinuon, nasinati ang pag-ubos sa inflation rate sa ubang mga nag-unang produkto ug serbisyo sama sa pabalay, kuryente ug gaas, transportasyon, lakip sab presyo sa karne ug isda, itlog ug daily products, prutas ug gulay, ug mga ready made products.
Sumala sa PSA, ang maong inflation rate, nagsukod sa mga pagbag-o sa gasto sa panginabuhi base sa mga paglihok sa mga presyo sa usa ka espesipikong panginahanglan nga dagkong palaliton.
Kini nagtumong sa tinuig nga rate o kausaban sa Consumer Price Index.
via || Bombo LJF
