DAVAO CITY – Misaka og usa ka ang-ang ang inflation rate dinhi sa Davao Region ngadto na sa 9.4% kon itandi sa 9.3% nga natala kaniadtong Disyembre ning nakalabayng tuig.
Sumala sa Philippine Statistics Authority, usa sa mga nakitang hinungdan sa taas nga inflation rate mao ang pagsaka sa presyo sa mga nag-unang panginahanglan sama sa tubig, gas, kuryente, ug pabalay ngadto sa 8.8% kon itandi sa 7.9%kaniadtong Disyembre.
Apan miubos hinuon ang inflation sa presyo sa mga pagkaon ug ilimnon ug 10% gikan sa 10.6%; ug transportasyon nga niubos ug usa ka ang-ang gikan sa 13.% sa susamang panahon.
Sumala sab sa ahensya, namatikdan ang taas nga inflation rate sa Davao Oriental nga nasa 10.2% gikan sa 9.2%; Davao del Sur nga anaa sa 9.9% gikan sa 9.8%; ug Davao del Norte gikan 6.6 ngadto sa 6.9% nga natala sa susamang panahon. Namatikdan hinuon ang ubos nga inflation rate sa Davao de Oro diin, Davao Occidental ug Davao City.
Sa pagkakaron, ang inflation rate sa Davao Region karong panahuna ang usa sa pinakataas sa tibuok nasud nga nisunod lamang sa 10.3% sa Western Visayas; ug 9.4% sa Central Luzon.
Nisipa sab ang inflation rate sa tibuok nasud nga anaa na karon sa 8.7% sukad pa sa bulan sa Enero, ning tuiga.
via || Bombo LJF
