Mikunhod og 23.25 porsyento ang index crimes sa 2025, nga giila sa Davao City Police Office (DCPO) nga resulta sa mas hugot nga operasyon ug lig-on nga pakig-uban sa lokal nga panggamhanan.
Mikunhod ang kinatibuk-ang index crimes gikan sa 708 ka insidente sa 2024 ngadto sa 542 ka insidente sa 2025, nga nagpasabot og 166 ka kaso nga nakunhuran.
Nitala ang dakong pagkunhod sa mga kaso sa theft, rape, ug robbery tungod sa mas lig-on nga police visibility ug mas epektibong pagpatuman sa balaod sa tibuok dakbayan sa Davao.
Ang index crimes naglakip sa mga krimen batok sa usa ka indibidwal, sama sa murder, homicide, physical injury, ug rape, ug batok sa kabtangan, sama sa carnapping, theft, robbery, ug uban pa.
Kini usab gigamit isip sukdanan sa ka-epektibo sa kapulisan, ilabi na kon adunay dakong pagkunhod sa mga insidente.
Matod ni Col. Mannan C. Muarip, acting chief sa DCPO, ang kalampusan gihatag sa estratehikong operational plans, intelligence-driven policing, ug padayon nga police visibility.
Gipasalamatan usab niya ang suporta sa City Government, nga matod pa niya, pinaagi sa padayon nga commitment sa kalinaw ug kahusay lakip ang policy support, pagdugang sa mga kagamitan, ug inter-agency coordination dakong tabang nga nakapauswag sa abilidad sa DCPO sa paghatag og epektibo, responsive, ug people-centered nga police services.
Gipasalig sa DCPO ang mga Davaoeño nga padayon pa nilang palig-onon ang crime-prevention ug law-enforcement interventions aron matubag ang nagkadaghang hulga ug mapadayon ang kalinaw ug kahusay sa siyudad.
