Ipahigayon sa unang higayon sa Coastal Road, Tulip Drive ang Indak-Indak sa Kadayawan isip kabahin sa Kadayawan Festival 2026, human hatagan og katumanan sa City Government of Davao ang sugyot nga ibalhin ang maong ginaabangan nga kompetisyon sa mas halapad nga lugar.
Gipahibalo sa lokal nga panggamhanan nga ang lakang gitumong aron mas mapalapdan ang lugar alang sa mga partisipante ug mga manan-aw, ilabina tungod sa kadaghan sa mga tawo nga motambong matag tuig sa Indak-Indak sa Kadayawan.
Sumala pa sa mga opisyal, dugay nang gisugyot nga mas angay ipahigayon ang maong kalihokan sa Coastal Road tungod sa mas dako nga espasyo niini kumpara sa naandang venue. Dugang pa niini, ang pagbalhin sa venue kabahin sa mas dakong pagpangandam alang sa Kadayawan Festival 2026, diin gilauman nga mahimong mas dako ug mas engrande ang selebrasyon karong Agosto.
Lakip sa mga giandam sa Davao City Government ang 26 ka mga kalihokan ug mas dakong pondo nga mokabat sa P68 milyon aron masiguro ang malampusong pagpatuman sa pista.Kahinumduman nga ang Kadayawan Festival giila isip usa sa pinakadakong festival celebration sa Mindanao, nga nagsaulog sa kultura, tradisyon, panaghiusa, ug mga panalangin sa katawhan sa Davao City.
Sa kasamtangan, padayon ang koordinasyon sa nagkalain-laing ahensya aron masiguro ang hapsay, luwas, ug malampusong pagdumala sa Kadayawan Festival 2026 nga pormal nga ablihan karong Agosto 7.
