DAVAO CITY – Luyo sumala pa sa kahadlok sa pipila ka mga indibidwal kalabot sa pagpabakuna, ubay-ubay sumala pa nga mga Dabawenyos ang misugot nga pabakunahan ang ilang mga anak human nga naangkon karon ang target immunization coverage sa Department of Health (DOH) ug City Health Office (CHO) atol sa unang round sa poliovirus vaccine mass immunization sa 60 barangay sa dakbayan.
Base sa data gikan CHO, milabaw sumala pa sa 100 percent target ang ilang napailalom sa oral polio vaccine (OPV) atol sa Sabayang Patak Kontra Polio sa District A cluster.
Samtang ang District B sa first district ang adunay pinakaubos nga coverage rate uban ang 62.2 percent, diin nagpasabot kini nga katunga pa sa populasyon ang kinahanglan ipailalom sa pagbakuna.
Sa kasamtangan anaa na matud pa sa immunization rate nga 85.9 percent ang nahimo dinhi sa dakbayan.
Gitataw sab sa CHO nga gikan sa 1,775,934 nga kinatibuk-ang populasyon, 186,864 ka mga indibidwal nga gilangkuban sa bata nga edad zero ngadto na 59 months ang nahatagan ug oral polio vaccine type 2 (OPV2).
