DAVAO CITY – Pang-gukdon sumala pa sa Tourism Office ug sa Business Bureau Office ang mga online nga mga negosyo sa dakbayan sa Dabaw nga iligal nga nag-operate.
Gikanayon ni Business Bureau OIC Marissa Torentera nga angayang ipa-rehistro usab sa mga online businesses ang ilang operasyon aron malikayan ang mga legal issues.
Dugang pa ni Torentera nga kanunay ang ilang monitoring sa nahisgutang mga kalihukan nga gina-advertise sa mga social media platforms sama sa Facebook.
Ang nahisgutang mga negosyo ang angayang mo-issue usab ug resibo sa matag cash transactions ug dokumento sa payment process.
Hugot usab nga nag-koordinar ang duha ka mga ahensiya aron matultulan ang mga illegal online businesses nga wala mihatag sa ilang mga address ug contact numbers.
Kinsa kadtong masuta nga ilegal nga nag-operate, mag-atubang og multa o kaha mag-atubang og kaso nga ipasaka batok kanila sa City Legal Office gumikan sa pagsupak sa Revenue Code.
Sa pikas bahin, gipahimutang sa lokal nga kagamhanan ang BOSS o Business One-Stop Shop information desk diin ang mga kliyente makahimo sa pagpangayo ug tabang labot sa pagkuha ug business permit, pa-unsa mobayad ug buhis ug pagkuha ug mga required documents sa pagpahimutang ug usaka negosyo.
Kini ang gilangkuban sa mga online sellers, online nga travel and tours, travel agencies ug uban pa nga negosyo nga naga transak pinaagi sa internet o sa social media.
Sa karon, duna nay na-monitor nga mga online travel agency ang business bureau apan dili una sumala pa nila kini ibutyag ngadto sa publiko.
