DAVAO CITY – Subli nga nakasinate ug pagbaha ang pipila ka mga lugar sa Davao region human nag nasinatian nga mga pag-ulan kagahapong adlawa hatud sa mipatigbabaw nga Easterlies/ITCZ nga nakaapekto sa pipila ka bahin sa Mindanao.
Kahinumduman nga subling nangandam ang mga sakop sa rescue group arun tabangan sa pagpahikling ang mga residente nga posibleng maapektohan sa mga pagbaha.
Dinhi sa dakbayan sa Davao, hugtanon nga gibantayan ang pagsaka sa tubig baha sa Tamugan River nga nagsubay sab paingon sa downtown area.
Apektado sab sa kusog nga baha ang mga residente sa Pagan Grande Marilog District ug pipila ka area sa maong dapit.
Nagpahimangno na lamang karon ang City Disaster Risk Reduction and Management Office (CDRRMO) ngadto sa mga nanimuyo daplin sa kasapaan nga dili mukumpiyansa sanglit makasinate pa gihapon ug mga pag-ulan ang dakbayan ilabi na panahon sa kahapunon ngadto na sa kagabhi-on.
Samtang pasado alas dos kaganinang kaadlawon, anaa sa Code orange ang water level sa Talomo river ug Brgy. Tugbok diin adunay pagsaka ang tubig baha.
Tanan nga mga BDRRMCs ug Volunteer Groups sa Talomo River ang gipahimangnoan nga mangandam alang sa evacuation areas ug kinahanglan magpahigayon ug rekorida sa komunidad ilabi na kadtong nanimuyo daplin sa kasapaan.
