DAVAO CITY – Ipatuman karong bulan sa Abril, ning tuiga, ang ikatulong hugna sa pagpasaka sa daily minimum wage dinhi sa Davao Region. Anaa sa P15 ang ipatumang pagsaka sa inadlaw nga suhol sa mga kumpanya sa retail/service industry nga dunay ubos sa napulo ka mga empleyado.
Mulangkob na sa P443 ang mamahimong daily wage sa mga empleyado sa maong sektor.
Kahinumduman nga gipatuman na ang unang duha ka hugna niini kaniadong Hulyo 2022 nga muabot sa P31, ug niadtong Enero 2023 nga nasa P16 nga pagsaka alang sa mga nahimutang sa Industrial/Commercial and Retail/Service industries ilawom sa Wage Order sa Regional Tripartite Wages and Productivity Board sa Department of Labor And Employment 11.
Gikanayon ni Atty. Randolf Pensoy, regional director sa DOLE-Davao, nga nahimong luag ang pagdawat sa mga employers niini ug wala sila’y nadawat nga mga petisyon nga ma-exempt sa maong pagpagsaka sa suholan.
Nagpadayon gihapon ang ilang monitoring sa mga kumpanya nga wala mipatuman sa maong siste sa suholan nga gikatakdang pasakahan og legal nga aksyon sa buhatan.
Samtang anaa sa P438 ang daily wage sa mga nasa agriculture sector dinhi sa rehiyon.
via || Bombo LJF
