DAVAO CITY – Nakigtigom na ang City Health Office (CHO) sa pipila ka mga personahe sa Barangay ug gikatakda sab sila nga makigkita sa mga pediatrician kini aron nga mapangandam pag-ayo ang ikaduhang round sa Sabayang patak kontro polio karong Nobyembre 25 hangtud Disyembre 7.
Plano sa CHO nga maangkon ang 110 porsyento nga target sa mabakunahan nga mga bata.
Sumala pa kang Julinda Acosta, head sa Technical Division sa CHO, kinahanglan nila nga siguruhon nga walay mga bata nga dili mabakunahan batok polio hinungdan nga sama sa unang round sa bakuna, kalakip sab sa ilang bisitahon ang mga mall ingon man mga terminal hinungdan nga posibleng dili lamang mga bata dinhi sa dakbayan ang ilang mahatagan ug bakuna kung dili lakip na sab kadtong nanimuyo sa mga kasikbit nga lugar.
Nasayran nga ang dakbayan sa Davao nakaangkon og 98.48 percent nga target sa unang round sa bakuna nga gipahigayon kaniadtong Oktubre 14 hangtud 27 ning kasamtangan nga tuig.
