Dungan nga gisaulog karong adlawa ang ika-57 nga sumad sa pagkahimuso sa tulo ka mga probinsya dinhi sa Davao Region nga mao ang Davao Oriental, Davao Del Norte ug Davao De Oro.
Kaganihang buntag adunay gipahigayon nga parada sa tulo ka mga probinsya nga gitambungan sab kini sa ilahang lokal nga mga lideres.
Sama pananglitan sa probinsya sa Davao Del Norte adunay mga bisita nga gikan sa nagkadaiyang siyudad ug munisipyo nga sakop sa probinsya ang nakigtambayayong sa kalihukan nga gisalmutan sa mga pribado ug publiko nga mga buhatan nga mipartisipar sa civic parade nga nagsugo gikan sa Tagum Historical Park hangtod na sa Davao Del Norte Complex diin dungan sab sa pag-abri sa Kadagayaan Festival 2024 nga adunay gipahigayon nga ceremonial ribbon cutting nga nagsilbing timaan sa pagpasundayag sa mga aktibidad.
Samtang sa probinsya sa Davao Oriental, gisugdan ang pagsaulog sa selebrasyon pinaagi sa santos nga misa nga gitambungan kini sa nagkadaiyang sektor sa probinsya isip pasalamat sa nakab-ot nga mga kalambuan sa nasampit nga probinsya.
Adunay daghanang mga kalihukan sa probinsya nga pipila niini ang labing-unang Kiay-kiay sa Kabilin Festival(street dancing competition), nga ang tumong mao ang pagpromotar ug pagpreserba sa cultural heritage sa Davao Oriental, nga gisalmutan sa unom ka mga cultural dance diin naangkon ang;
1st Place (P500,000) – CARAGA MANDAYA PERFORMING ARTS ENSEMBLE
2nd Place (P400,000)- KABILIN MINDANAW OF MALITA DAVAO OCCIDENTAL
3rd Place (P300,000)- MATIAO NHS SPECIAL PROGRAM IN THE ARTS
4th Place (P200,000)- CAGANGANAN DANCE ENSEMBLE
5th Place (P100,000)- LAMDAG CULTURAL ENSEMBLE- TRIBU BONSAYANON
5th Place (P100,000)- TRIBU BIMAMWA OF MARAGUSAN
Samtang gawas niana, adunay gipahigayon sab nga pasundayag sa mga utukan ug mga maanyag nga mga kababainhan sa nasampit nga probinsya pinaagi sa Mutya ng Davao Oriental nga gipresentahan sa matag munisipalidad.
Sa bahin sab sa probinsya sa Davao Del Sur,adunay gipahigayon sab nga mga kalihukan nga alayon kini sa tema nga: “Ang Legasiya Nagpabiling Buhi ug Malig-on alang sa Maanyag nga Probinsiya ug Tanang Madasigon na DAVSURANON”, nga kung diin gihinuklugan niini ang mga kabilin ug kusog aron nga mapasabot niini ang maanindot nga mga kabilin ug lig-on nga mga katawhan.
Nasayran nga niadtong May 8, 1967, pinaagi sa Republic Act No. 4867, ang probinsya sa Davao ang gibahin sa tulo ka mga probinsya nga gilangkuban sa Del Sur, Del Norte ug Oriental nga dungan nagsaulog karong adlawa sa anibersaryo nga gideklara sab kini nga Holiday.
