DAVAO CITY- Ipahigayon sa Mindanao Coalition on Children’s Rights (MCCR) kauban ang Mindanao Peace Council ug Kawanis International ang ika-33 nga selebrasyon sa Universal Children’s Day ug Davao City Children’s Day karong umaabot nga Nobyembre 20 ning kasamtangang tuig.
Gikanayon sa Child Representative, Sunflower Kidz Movement President Lawrence Taguran nga nakig-alayon usab sila sa Philippine Drug Enforcement Agency (PDEA) XI ug Commission on Human Rights XI aron mapakusgan pa ang kampanya batok iligal nga droga, sexual abuse sa mga bata ug ang nagkataas nga teenage pregnancy sa dakbayan. Kini subay usab sa Executive Order No. 7 Series of 2009.
Isip kabahin sa selebrasyon, aduna sab mga aktibidades nga ipahigayon sa maong organisasyon sama sa Multi-Cultural Sectoral Celebration diin kapin kinyentos ka mga bata gikan sa nagkalain-laing mga lugar sa Mindanao ang gilaumang musalmot.
