DAVAO CITY- Gidagsa og daghanang mga indibidwal, ug mga deboto ang pagsugod ika-176th ka tuig nga kasaulugan sa San Pedro Cathedral karong adlawa.
Gisugdan ang maong kalihukan sa usa ka santos nga misa ingon man ang nahitabong ordinasyon sa walo ka mga bag-ong pari dinhi sa diocese of Metropolitan Davao.
Samtang unyang gabii ipahigayon ang Paghiusayaw nga kini usa ka socio-cultural night unyang alas 6:30 ang takna sa gabii diin kini kabahin sa Duaw Dabaw Festival nga gitunong sa kapistahan sa patron saint sa syudad sa Davao.
Kini nga mga pasundayag masaksihan sa mga manan-away ang mga sayaw nga naggikan sa mga nasud sa Japan, Thailand, Samoa, Saudi Arabia, Brazil, India ug dinhi sa atoang nasud. Pagasalmutan kini sa unom ka mga zona sa parokya.
Gipaklaro sab ni Harold Quibete ang nag organisa sa maong kalihokan nga dili lamang kini alang sa mga katoliko apan alang usab kini sa tanang mga Dabawenyo.
Gikanayon sab niini nga adunay 350 ka mga partisipante ang magpasundayag pinaagi sa Pagsayaw nga gawas sa laing nasud adunay maggikan sab sa nagkadaiyang bahin sa Pilipinas partikular na dinhi sa dakbayan.
Samtang sa kabahin sab sa seguridad, nakahan-ay na ang security plan sa kapulisan sa palibot sa maong dapit diin gipakatagusab ang daghanang mga security personnel gikan sa managlahing ahensya aron sa pagsiguro sa luwas ug hapsay nga selebrasyon.
Ang maong Paghiusayaw usa ka selebrasyon ilawon sa Duaw Dabaw Music Festival nga mulangtad hangtod ugmang adlawa Hunyo 30, ning kasamtangang tuig.
Una na sab nga nagpahibalo ang City Transport and Traffic Management Office kon CTTMO sa mga motorista nga adunay temporaryo nga pagasirad-an nga dalan nga padulong sa San Pedro St. nga mao kining mga dalan nga gikan sa kanto. C.M. Recto Ave. ug sa Rizal St. kanto sa Bolton St.
Alang sab sa giya sa mga motorista adunay gipaguwa nga hulagway ang nasampit nga buhatan nga nakabutang ang mga detalye niini.
